អង់គ្លេស៖ កីឡាករ Mohamed Salah របស់ Liverpool បានរងការរិះគន់ជាខ្លាំងពីសំណាក់អ្នកគាំទ្រជាជនម៉ូស្លីមរបស់ខ្លួន ក្រោយពីគេបានបង្ហោះរូបភាពភ្ជាប់ជាមួយសារក្នុងថ្ងៃបុណ្យណូអែល។ ម្សិលមិញនេះ! Salah ដែលជាអ្នកកាន់សាសនាឥស្លាម បានបង្ហោះរូបភាពដើមគ្រិស្តម៉ាសមួយសន្លឹក ភ្ជាប់ជាមួយសារមួយដែលជាប់ទាក់ទងទៅនឹងវិបត្តិក្នុងតំបន់ប៉ាឡេស្ទីនជាមួយអ៉ីស្រាអែល មុននឹងបញ្ចប់ដោយការជូនពរអ្នកគាំទ្រជាមួយពាក្យ Merry Christmas។
ជាធម្មតា អ្នកកាន់សាសនាឥស្លាមពុំប្រារព្ធពិធី ឬអបអរថ្ងៃបុណ្យណូអែលទេ ប៉ុន្តែក៏មានខ្លះទៀតក៏បានចូលរួមក្នុងពិធីបុណ្យដែលធ្វើឡើងក្នុងគ្រិស្តសាសនានេះផងដែរ។ កាលពីឆ្នាំមុន Salah ត្រូវបានអ្នកគាំទ្ររិះគន់លើបណ្តាញសង្គមម្តងរួចមកហើយ ដោយសារតែរូបគេរួមជាមួយភរិយា ឈ្មោះ Magi និងកូនស្រី Makka និង Kayan បានថតរូបភាពនៅមុខដើមគ្រិស្តម៉ាស ហើយជាថ្មីម្តងទៀតនៅឆ្នាំនេះកីឡាករសញ្ជាតិអេហ្ស៊ីបខាងលើ ត្រូវបានអ្នកគាំទ្រមិនពេញចិត្តដោយការចូលរួមអបអរសាទរពិធីបុណ្យណូអែលសាជាថ្មី។
អ្នកគាំទ្រម្នាក់បានសរសេរថា Salah គឺជាភាពអាម៉ាស់ដល់ជនមូស្លីម ហើយអ្នកគាំទ្រម្នាក់ទៀតបានសរសេរថាកីឡាកររូបនេះពិតជាថោកទាបណាស់! ព្រោះគេគឺជាអ្នកកាន់សាសនាឥស្លាម មិនមែនគ្រីស្ទានទេ អញ្ចឹងពិធីបុណ្យគ្រិស្តម៉ាសរបស់ឥស្លាមគឺខែមេសា ពិតជាគួរឱ្យខ្មាសអៀនណាស់!។ ដោយឡែក ក៏មានមនុស្សម្នាក់ផ្សេងទៀតដែលបង្ហាញថាជាអ្នកគាំទ្រ Arsenal បានសរសេរថា "Mo Salah ខ្ញុំស្រលាញ់អ្នកក្នុងនាមជាអ្នកគាំទ្រ Arsenal ។ ខ្ញុំបានចាត់ទុកអ្នកជាកីឡាករដ៏ល្អម្នាក់ ហើយអ្នកតែងតែជាអ្នកជំរុញទឹកចិត្តខ្ញុំ។ ទោះជាយ៉ាងណាក៏ដោយ បន្ទាប់ពី tweet នេះ ខ្ញុំមិនអាចមើលអ្នកគឺជាគំរូរបស់ខ្ញុំទៀតទេ។ អ្នកធ្វើឱ្យខ្ញុំខកចិត្ត។ ប្រសិនបើអ្នកមិនលុប tweet នេះទេ ខ្ញុំនឹងត្រូវ unfollow អ្នក។"
យ៉ាងណាក្ដី ក៏មានអ្នកគាំទ្រជាច្រើនផ្សេងទៀតបានការពារ Salah ផងដែរ ដោយបាននិយាយថា ""ក្នុងនាមជាអ្នកកាន់សាសនាឥស្លាម យើងមិនគួរវិនិច្ឆ័យលើអ្នកដទៃឡើយ ប៉ុន្តែអ្នកគាំទ្រជាច្រើនតែងតែរិះគន់មកលើ Salah រៀងរាល់ពិធីបុណ្យណូអែល។ ខ្ញុំគិតថាយើងទាំងអស់គ្នាមិនល្អឥតខ្ចោះទេ។ Free Palestine"។
សូមបញ្ជាក់ថា នៅក្នុងសាររបស់ Salah បានបង្ហាញអត្ថន័យយ៉ាងដូច្នេះថា៖ "បុណ្យណូអែលជាពេលដែលគ្រួសារជួបជុំគ្នាអបអរ។ ប៉ុន្តែជាមួយនឹងសង្រ្គាមដ៏ឃោរឃៅកំពុងបន្តនៅមជ្ឈិមបូព៌ា ជាពិសេសការស្លាប់ និងការបំផ្លិចបំផ្លាញនៅហ្គាហ្សា ឆ្នាំនេះ ពួកយើងឈានដល់បុណ្យណូអែលដោយទុក្ខក្នុងបេះដូងដ៏ធ្ងន់ ហើយយើងចែករំលែកការឈឺចាប់របស់គ្រួសារទាំងនោះដែលសោកសៅចំពោះការបាត់បង់មនុស្សជាទីស្រលាញ់របស់ពួកគេ។ រីករាយថ្ងៃបុណ្យណូអែល!"៕